Қарағанды облысына сапарды жоспарлау жеңілдей түспек: 2GIS картасында көрікті жерлер, туристік бағыттар және демалыс орындары туралы ақпарат көбейеді. Бұл туралы Visit Karaganda және 2GIS ынтымақтастық туралы меморандумға қол қойғаннан кейін мәлім болды.
Тараптар туристік нысандар туралы деректерді бірлесіп жаңартып, картаға жаңа бағыттар қосуды жоспарлап отыр. Қарқаралы, Балқаш және басқа да танымал бағыттарға ерекше назар аударылады. Бұл саяхатшыларға қызықты орындарды өз бетінше тауып, оларға баратын жолды жоспарлауға және өңірде бағдар табуға көмектеседі.
Visit Karaganda туристік ақпарат орталығының директоры Бахтиар Бекмурзаевтың айтуынша, облыста цифрлық карталарда әлі жеткілікті көрсетілмеген көрікті жерлер көп. Оның сөзінше, Буйратау және Қарқаралы ұлттық парктері, Қызыларай таулары және облыстың ең биік нүктесі — Ақсоран шыңы сияқты орындарға өз бетімен жету туристерге қиын болуы мүмкін.
