Ұлттық ауыл шаруашылығы санағы 2025 жылғы 1 тамыз бен 20 қазан аралығында БҰҰ Азық-түлік және ауыл шаруашылығы ұйымының (ФАО) қолдауымен өтті. Ол 20 жылға жуық уақыттағы осы ауқымдағы алғашқы зерттеу болып, 2006–2007 жылдардағы санақтан бергі өзгерістерді бағалауға мүмкіндік берді.
Санақ ел бойынша шамамен 290 мың ауыл шаруашылығы құрылымын және 1,7 млн жеке қосалқы шаруашылықты қамтыды. Ауыл шаруашылығы құрылымдары мен жеке қосалқы шаруашылықтардың қамтылуы 97% болды.
Деректер цифрлық технологияларды пайдаланып жиналды. Ауыл шаруашылығы құрылымдарының 92%-ы және жеке қосалқы шаруашылықтардың 19%-ы онлайн санақтан өтті. Сұхбат алушылар респонденттерге барған кезде санақ парақтарын планшетпен толтырды.
Алдыңғы санақпен салыстырғанда ауыл шаруашылығы құрылымдарының саны 42%-ға — 204 мыңнан 290 мыңға дейін өсті. Ауыл шаруашылығы кәсіпорындарының саны 9,5 мыңнан 21 мыңға, ал шаруа және фермер қожалықтары мен жеке кәсіпкерлер саны 194 мыңнан 269 мыңға дейін артты.
Егіс алқабы 18,3 млн гектардан 23,2 млн гектарға ұлғайды. Дәнді дақылдардың үлесі 81%-дан 69%-ға төмендеп, майлы дақылдардың үлесі 4%-дан 17%-ға өсті.
Мал басының шаруашылық санаттары бойынша бөлінісі де өзгерді: шартты басқа шаққандағы жалпы мал басының ауыл шаруашылығы құрылымдарына тиесілі үлесі 2025 жылы 68%-ға жетті, ал жеке қосалқы шаруашылықтардың үлесі 32% болды. Ұйымдасқан секторда шамамен 707 мың адам жұмыс істейді; есепке алынған өздігінен жүретін ауыл шаруашылығы техникасының 57%-ы 10 жылдан астам уақыт пайдаланылып келеді.
Санақ қорытындылары интерактивті виджеттер мен дашбордтарда, машина оқи алатын электрондық кестелерде және статистикалық жинақта жарияланды. Деректерді stat.gov.kz сайтындағы «2025 жылғы ұлттық ауыл шаруашылығы санағы» бөлімінен көруге болады. Ақпарат Ұлттық статистика бюросының мәліметіне негізделген.
