Қазақстан ауыл шаруашылығы вице-министрі Аманғали Бердалин АҚШ-тың Айдахо және Монтана штаттарының ауыл шаруашылығы департаменттері басшылығымен және америкалық агробизнес өкілдерімен келіссөз өткізді. Тараптар асыл тұқымды мал жеткізу және америкалық генетиканы енгізу мәселелерін талқылады.
Кездесулер вице-министрдің АҚШ-қа жұмыс сапары аясында өтті. Келіссөздерде Бердалин Қазақстанның жайылымдық жер көлемі бойынша әлемде бесінші орында екенін, оның аумағы шамамен 180 млн гектарды құрайтынын айтып, сиыр еті, қой еті және сүт өндірісін арттыру мүмкіндігіне тоқталды.
Биыл Мемлекет басшысының тапсырмасы бойынша 2026–2030 жылдарға арналған мал шаруашылығын дамыту жөніндегі кешенді жоспар бекітіліп, іске асырылып жатыр. Ол генетиканы жақсартуды, жемшөп базасын нығайтуды, қаржыландыруды кеңейтуді, технология енгізуді және өнім өңдеуді дамытуды қамтиды.
Сапардың негізгі нәтижелерінің бірі — ҚР Ауыл шаруашылығы министрлігі мен америкалық Trans Ova Genetics, LC компаниясы арасында ынтымақтастық туралы меморандумға қол қою. Құжатта Қазақстанда ірі қара эмбриондарын алу, бағалау, криоконсервациялау және трансплантациялауға арналған мамандандырылған эмбриологиялық зертхана ашу, сондай-ақ шетелдік сарапшыларды тарта отырып қазақстандық мамандарды оқыту қарастырылған.
Қазақстанда қазір қызыл ет өндіру бойынша толық циклді алты жоба іске асырылып жатыр, ал елдің оңтүстігінде алғашқы мамандандырылған мал биржасы салынуда. Тараптар америкалық ашық баға қалыптастыру стандарттарына сай мал аукциондарын өткізуге қазақстандық мамандарды оқытуға келісті.
Келіссөздерде сүтті мал шаруашылығы да ынтымақтастықтың келешекті бағыты ретінде аталды. Соңғы жылдары елде әрқайсысының орташа құны шамамен 9 млн доллар болатын 100-ден астам заманауи сүт-тауар фермасы салынды. Цифрлық технологияларды қолданатын тағы 50 тиімділігі жоғары ферма құрылысына жеңілдетілген несие беру көзделген.
Америкалық компанияларға фермаларды жабдықтау және жабдық құрастыруды Қазақстанда жергіліктендіріп, Орталық Азия нарығына шығу ұсынылды. Тараптар Монтана штатының етті мал шаруашылығы, ал Айдахо штатының өнеркәсіптік сүт өндірісі және өңдеу саласындағы тәжірибесін пайдаланып, уағдаластықтарды нақты инвестициялық және сауда жобаларына айналдыруға келісті. Бірлескен бастамаларды сүйемелдеу үшін министрлік мемлекеттік органдар, бизнес және ғылыми ұйымдар қатысатын тұрақты жұмыс алаңын ұйымдастырады.
