Қазақстанда 2026 жылдың он айында ана өлімі өткен жылдың сәйкес кезеңімен салыстырғанда 32%-ға азайды. Денсаулық сақтау министрлігінің мәліметінше, бұған ана мен бала денсаулығын қорғау жүйесін жетілдіру, ерте диагностика және медициналық көмектің қолжетімділігін арттыру ықпал еткен.
Елде репродуктивті жастағы әйелдердің қауіп факторларын ерте анықтауға, уақытылы тексеруге және ықтимал асқынулардың алдын алуға бағытталған «Аналар саулығы» бағдарламасы жүзеге асырылып жатыр. Әйелдер емханаларында дені сау жүктілікке дайындалу үшін 12 түрлі тексеруден өте алады.
37 емханада және 23 перинаталдық орталықта әйелдер консультациялары қайта ашылды. Бір миллионнан астам әйел осы қызметтерді алды. Жүктіліктің 10 аптасына дейін есепке тұрған әйелдердің үлесі 18%-ға өсіп, 71%-ға жетті.
