Қазақстанда әлеуметтік қолдау шараларын пайдаланған дәрігерлер саны екі жылда 263-тен 1760 адамға дейін өсті. Мемлекет медицина қызметкерлерін тұрғын үймен қамтамасыз ету, көтермеақы төлеу және коммуналдық шығындарын өтеу мүмкіндіктерін кеңейтіп жатыр.
2023 жылы әлеуметтік қолдауды 263 дәрігер, 2024 жылы 796, ал 2025 жылы 1760 маман алды. Осылайша, қолдау алушылар саны 6,7 есе артты.
Бұл шаралар ең алдымен өңірлерге медицина кадрларын тартуға және оларды сол жерде тұрақтандыруға, халыққа дәрігерлік көмектің қолжетімділігін арттыруға бағытталған.
Қазақстанның денсаулық сақтау жүйесінде қазір 280 мыңнан астам медицина қызметкері еңбек етеді. Олардың шамамен 84 мыңы — дәрігер, 196 мыңнан астамы — орта буын медицина маманы.
Медициналық білім беру жүйесі де жетілдіріліп жатыр. Қабылданған заңнамалық өзгерістер болашақ дәрігерлердің практикалық даярлығын күшейтуді және кәсіби мамандану жүйесін дамытуды көздейді.
Медицина қызметкерлерін қорғауға да ерекше көңіл бөлінеді. 2026 жылы кәсіби міндеттерін атқару кезінде медицина қызметкерлеріне қоқан-лоқы көрсету және күш қолдану үшін қылмыстық жауапкершілік күшейтілді.
Денсаулық сақтау министрлігі медицина қызметкерлерінің кәсіби мәртебесін көтеру, кадрлық әлеуетті нығайту және елдің барлық өңірінде дәрігерлерге қолайлы еңбек жағдайларын жасау бағытындағы жұмысты жалғастырып жатыр.
