Қазақстандықтар жұмыс іздеу, кәсіптік оқу, біліктілікті растау, қолдау шараларын алу және жеке ісін ашу үшін Еңбек және халықты әлеуметтік қорғау министрлігінің цифрлық сервистерін пайдалана алады. Қызметтерді онлайн алуға немесе мансап орталығына баруға болады.
Enbek.kz электрондық еңбек биржасында және Enbek мобильді қосымшасында жеке кабинет ашып, түйіндеме жариялауға, бос орындарды іздеуге және жұмыс берушілерге өтінім жіберуге болады. Сондай-ақ жұмыс іздеуші ретінде тіркеліп, кейін жұмыссыз ретінде проактивті тіркеуден өтуге болады. Құқығы бар азамат жұмысынан айырылуына байланысты әлеуметтік төлем алуға өтініш бере алады.
Enbek.kz базасында енгізіліп жатқан Цифрлық жұмыспен қамту қызметі мемлекеттік ақпараттық жүйелердегі деректер негізінде азаматтың келісімімен цифрлық түйіндеме жасайды. Жасанды интеллект маманның біліктілігі мен қалауын ескеріп, лайықты бос орындарды ұсынады; ИИ-көмекшімен диалог арқылы үйге жақын жұмыс іздеуге, басқа өңірлердегі ұсыныстарды қарауға немесе оқу мен мемлекеттік қолдау туралы кеңес алуға болады.
Skills Enbek платформасында біліктілікті арттыруға немесе жаңа дағдыларды меңгеруге арналған тегін онлайн курстар бар. Тіркелген жұмыссыздар білім беру ұйымдарында немесе жұмыс берушіде қысқа мерзімді кәсіптік оқудан өте алады. Career Enbek арқылы белгіленген талаптарға сай болса, кәсіптік біліктілікті тану рәсімінен тегін өтуге ваучер алуға өтініш беруге болады.
Кәсіп ашуды жоспарлағандар Business Enbek платформасында «Бастау Бизнес» жобасы бойынша кәсіпкерлік негіздеріне оқыту шарттарына сәйкестігін тексеріп, талаптар орындалған және өтінім қабылдау кезеңі ашық болған жағдайда бизнес-идеяға мемлекеттік грант сұрай алады. «Ауыл Аманаты» бағдарламасы аясында микрокредит пен лизингке де өтініш беруге болады. Бұл сервис пилоттық тәртіпте Алматы, Қызылорда, Маңғыстау және Батыс Қазақстан облыстарында іске асырылып жатыр.
Азаматтар елдің басқа өңірлеріндегі бос орындарды, соның ішінде еңбек күші тапшы өңірлерге ерікті түрде қоныс аудару мүмкіндігін қарастыра алады. Migration Enbek платформасы арқылы қоныс аудару жөнінде кеңес алу үшін мансап орталығына өтініш жіберуге болады.
Өз бетінше жұмыс таба алмағандар тіркелген жері бойынша мансап орталығына жүгіне алады. Мамандар жұмыс іздеуші ретінде тіркелуге көмектесіп, жұмыссыз мәртебесін алу тәртібін түсіндіреді, бос орындар мен қолдау шараларын ұсынады және әңгімелесуге дайындалуға көмектеседі. Цифрлық жұмыспен қамту қызметінің жаңа тәсілі бойынша азаматқа жұмыс іздеу кезеңдерінде бірге жүретін маман бекітіледі.
