Қазақстан жерді қалпына келтіру шаралары жүргізіліп жатқан аумақ көлемі бойынша әлемде үшінші орын алды. БҰҰ-ның «Nature’s Comeback» атты алғашқы жаһандық баяндамасына сәйкес, мұндай жұмыстар елде 8,13 млн гектарда жүргізіліп жатыр. Бұл республика аумағының шамамен 3%-ын құрайды.
Баяндаманы БҰҰ-ның Азық-түлік және ауыл шаруашылығы ұйымы (ФАО), БҰҰ-ның Қоршаған орта жөніндегі бағдарламасы (ЮНЕП) және Биологиялық әртүрлілік туралы конвенция хатшылығы әзірлеген. Қазақстаннан жоғары көрсеткіш Қытайда — 127,4 млн гектар, Моңғолияда — 12,18 млн гектар.
Ауыл шаруашылығы министрлігі жер ресурстарын сақтау және ұтымды пайдалану жұмыстарын күшейтіп жатыр. Басымдық топырақтың жай-күйін бағалауға, деградацияға ұшыраған учаскелерді анықтауға және мониторингтің цифрлық құралдарын енгізуге берілген.
2025–2026 жылдары жер деградациясының электронды карталары 114 млн гектар аумақты қамтыды. Зерттеу нәтижесінде 2,7 млн гектар деградацияға ұшыраған ауыл шаруашылығы алқабы анықталды. Бұл деректер жердің жай-күйін бағалап, басым аумақтарды белгілеуге және топырақ құнарын сақтауға бағытталған шараларды жоспарлауға мүмкіндік береді.
Осы саладағы мемлекеттік саясатты жетілдірудің маңызды кезеңі — 2026 жылғы 8 шілдеде «Қазақстан Республикасының Топырақты қорғау туралы» заңының қабылдануы. Құжат топырақты зерттеу, қорғау және қалпына келтірудің құқықтық тетіктерін бекітеді.
Қазір министрлік жергілікті атқарушы органдармен бірлесіп, топырақты қорғау жөніндегі өңірлік жоспарларды пысықтап жатыр. Олар деградацияның алдын алу, ауыл шаруашылығы жерлерін қалпына келтіру және өнімділігін сақтау шараларын қамтиды.
