Қазақстанның денсаулық сақтау министрі Ақмарал Әлназарова өңірлерде нефрология бойынша құзырет орталықтарын жыл соңына дейін ашуды, диализ көмегінің сапасын көтеруді және оны қаржыландыру тәсілдерін жетілдіруді тапсырды. Бұл тапсырмалар министрліктің Алматыда өткен көшпелі алқа мәжілісінде берілді.
Министр бүйрек ауруларын ерте анықтауды күшейтіп, емханалар мен өңірлік медициналық ұйымдарда нефрологиялық көмектің қолжетімділігін арттыру қажеттігін атап өтті. Қазақстанда созылмалы бүйрек ауруы бар 40 мыңнан астам пациент бақылауда. Ал алғаш анықталған әрбір үшінші пациент көмекке аурудың терминалдық сатысында жүгінеді, бұл кезде бүйрек қызметін алмастыратын ем қажет болады.
Денсаулық сақтау министрлігінің мәліметінше, қосымша зертханалық талдауларды енгізу созылмалы бүйрек ауруын анықтау көрсеткішін 2025 жылғы 26 мың жағдайдан 2026 жылдың тоғыз айындағы 40 мыңнан астам жағдайға дейін арттырған. Қазір тоғыз өңірде нефрология бойынша құзырет орталықтары жұмыс істейді. Жетіспейтін орталықтарды 2026 жылдың соңына дейін ашу тапсырылды.
Алқа отырысында гемодиализ көмегінің сапасын бақылау және медициналық деректердің дұрыстығы да талқыланды. 6 400 пациент туралы деректерді талдау барысында соңғы гемодиализ күні пациенттің қайтыс болған күнімен сәйкес келген жағдайлар және медициналық көмектің көрсетілу хронологиясын нақтылауды қажет ететін жазбалар анықталған. Министр бейінді комитетке ақпаратты қайта салыстырып тексеруді және электрондық есептің дұрыстығын қамтамасыз етуді тапсырды.
Сондай-ақ меншік нысанына қарамастан диализ орталықтарының қызметіне сапа, қауіпсіздік және емнің үздіксіздігі тұрғысынан кешенді баға беру жоспарланған. Гемодиализді қаржыландыру тәсілдері көрсетілетін көмектің сапасы мен ем нәтижелерін ескере отырып жетілдірілмек.
Бүйрек трансплантациясын дамыту, әсіресе балаларға қатысты мәселе де басым бағыттардың бірі болады. Күту парағында 4,2 мыңнан астам қазақстандық бар. Министр балаларды шетелде трансплантациялауға жіберу өлшемдерін қайта қарап, қажетті қаржы есебін әзірлеуді тапсырды. Сонымен бірге ерте диагностиканы кеңейту, нефрология қызметінің кадрлық әлеуетін нығайту және трансплантациядан кейін пациенттерді бақылауды күшейту көзделген.
